مهما يطول الليل يا بلادى ...شمس الحق هتيجى تنادى

كنت هنزل بوست جديد خالص
وكنت جاية معايا المحبرة والشمعة الكبيرة
وهلبس نظارة العباقرة
واعتزل الناس
واتمسك بكيبوردى فقط....
وهقعد قاعدة محترمة ..
بس للأسف حتى مارضيوش اتهنى بمدونتى
وفوجئت بالخبر ده..

اعتقلت مباحث أمن الدولة مساء أمس الجمعة50 طالبًا أثناء قضائهم وقتًا للتنزُّه بمنطقة الهانوفيل بمحافظة الإسكندرية الساحلية في أحد المخيمات، ويجري الآن عرض الطلاب على النيابة، وهم (26 من كلية الهندسة بجامعة عين شمس، و17 من جامعتي المنوفية وبنها و7 من جامعة الإسكندرية).


خمسين واحد..ياظلمة..هتروحوا من ربنا فين؟؟
حتى فى الأجازة مش هترحموهم..
حسبى الله ونعم الوكيل فيكم

..........................................................
هفضل اقول لنفسى قبل ما انام علشان أصلا أعرف انام
مهما يطول الليل يا بلادى
شمس الحق هتيجى تنادى
يرجع نور الفجر النادى
ويداوى جراحك وفؤادى

........................

لو عندكم اى كلمة تقولوها قولوها جايز تخفف برده

هى دى اللى اسمها شوية فرفشة

يوم من عمرى2..عندما غابت شمس راس البر

هكملكم بقة واقولكم خرجنا من راس البر الساعة 7.45

يعنى ساعة تاخير..

عادى برده بنسنتنى فى البنات الامامير اللى معانا

اصلا راس البر كان الجو فيها جميل ..بعيد عن المناطق المشمسة طبعا

كان الجو رائع والشمس كانت بدات تغرب هناك كان شكلها سبحان الله تحفة..

ركبنا بقة و خدنا طريقنا لمدينتا العامرة وباتجاه جامعتنا الحبيبة..

رحلة العودة ..انحسرت ما بين خناق مع الاولاد وتوسل باغلاق الكاسيت وبين امور اكثر من رائعة

كالتدبر فى الكون وما ادراك بمصر ليلا

ايوة هو انا ماقولتلكمش

مش احنا وقفنا فى نص الطريق نجيب حلويات

لا لا ...ماتخافوش تقريبا هيا ساعة اللى كانت زيادة على الطريق

وده معناه ان الليل جه..والنجوم طلعت بقة والكاشفات اللى على الطريق طبعا ما اشتغلتش

ودى الميزة فى طرق مصر الحبيبة ..

ما فيش نور..نور القمر والنجوم كفاية ..وده بيخلى البنى ادم عايش ولا افلام الكرتون

غابة سيمبا ممكن..او حلقة من حلقات تيمون وبممبا فى الغالبة

بجد الطريق كان جميل..والاتوبيس كان سريع

البنات بتصفر والولاد بترقص..وقال ايه؟؟رحلة مهندسين

يا حسرة على الرجالة..قلناها وبقمة الياس كنا بنتنهد ..بس خلاص

زمن التنهيد خلص يا بنى ادمين والكاسيت لازم يطفى كده كتير..

رجع تانى السكوت..

الساعة عشرة

يعنى عشرة وربع كده

فاكرين اتفاقنا كان كام؟؟كان تمانية

مش مشكلة ..مهندسين بقة والدقة عندنا كل شئ

وصلنا الحمد لله ..كلنا سلام

وشربنا شاى وعصير واتغادينا..واتصورنا وصورنا كل حاجة

بس برده بيفضل الوضع المجبر انت عليه هو اصعب وضع..

الاسوء لما يكون وضع غلط وانت عارف انه غلط..بس مش قادر تعمل حاجة ..

اتكلمت وقلت..وقفت و منعت..وبرده لا الناس بتقتنع والوضع بيتغير

والاصعب لما نكتشف انه لسة فيه شباب مش شايل من هم الدنيا حاجة غير هم نفسه

وانه يكون فى بنات مش شايلة هم حاجة اصلا.

هون على الواحد كتير قدرة ربنا فى الكون..ربنا اللى ابدع وسوى هو قادر على انه يغيرمن الشباب د

بس شوية تعب معاهم و دعاء وهم بجد هيبقوا كويسين..

يارب اغفر تقصيرنا..واجبر كسرنا..وارحم ضعفنا

...رحلة ميناء دمياط..يوم من عمرى

أحكيلكم على حاجة امبارح كنا فى رحلة لميناء ..دمياط تبع مشروع التخرج
طبعا بعد ما جهزنا الباسبور وختمناه من بابا والتاشيرة من ماما
وجهزنا الساندويتشات والعصير والماية والشاى وكل اللى تتخيلوه..بنات بقة وطالعين رحلة.. هنبدا بقة اليوم من اوله علشان هو من اوله اصلا وهو جميييييييييييييل
التجمع كان المفروض من7.30 لغاية8.00 طبعا الباص اتحرك 9.0
عادى ويلكم ان ايجيبت..كنا بنستنى المعيد حد عندنه مانع..وبعدين اليوم طويل هتعملوا ايه غير تستنوا..
ركبنا ولله الحمد كان عمو السواق مشغل شريط لعمرو خالد عن عذاب القبر.
بس اول ما طبع الاتوبيس لسة بنفكر الناس بدعاء السفر فجأة طلع صوت من كل السماعات ?صوت أغانى..على الصبح ?ده احنا لسة يعنى ماطلعناش على الطريق
صوت بقة من آخر الباص لبنت معاناقولوله يعلى الصوت..احنا طبعا باستغراب..يعلى صوت ايه يا حبيبيتى؟الله يكرمها واحدة صحبتى كان معاها سامى يوسف.._مش جاى معاها يعنى _لا كان معاها له شريط أمتى..طبعا الشريط لا يعلى عليه..اكثر من رائعلكن تقولى لمين..الشريط اشتغل من هناوالتعليقات اشتغلت من هنا ..بس وايه يعنى اتكوموا فى جنب مش هنعبركم..الشريط اشتغل شوية ولقينا الاولاد مرجعيهولنا.ورجعوا يشغلوا الاأغانى تانى..واحنا وراهم ..وطوا الصوت..وطوا الصوت,الصوت عالى وطوه شوية ماينفعش كده..

الطريق ما يختلفش خالص عن اى طريق انى فيك يا جمهورية مصر

هو نفسه من هنا للقاهرة من هنا للاسكندرية

هو نفسه من هنا لدمياط..

بس مش عارفة هو نفسه ولا لأة لشرم؟؟

المهم نفس البيوت نفس الوشوش

وكان الناس ماشية معاكى او احنا مش بنتحرك نفس الزرع

ونفس المحلات حتى نفس الالوان

الطريق كان جميل...ومش فيه مطبات كتير..


وصلنا بسرعة ماشاء الله لدمياط الجديدة..

وصلنا المينااو يعنى مدخل المينا..

واكيد انتم عافين ايه اللى بنقابله على مدخل كل حاجة

من الاول المطار لغاية الجامعة لغاية حتى المسجد

حبيب القلب..

الامن ربنا يجعل كلامنا خفيف عليهم ا

لأمن حبيبنا عمل ايه؟؟

طلب من صحبتى المنتقبة انها تنزل
طلع معيد عندنا وقال..مممكن صحبت دى دقيقة هو ماكنش بيستاذنى يعنى

بس انا طبعا قلتله احنا مش هنسيبها ولا

دقيقةونزلت معاها تحت لقيت ايه بقة؟؟؟

لقيتهم بيقولوها يعنى لو ممكن تتفضل متكرمة مشكورة تخلع النقاب لغاية الميناء وبعد كده براحتها بقة...

الطلب كان من الامن مع علينا مش دى المكشلة

المشكلة فى الزحمة اللى كانت موجودة

والامن اللى ماكنش ولا واحد لابس فيه لبس الظباط ولاحتى عساكر

وبدا بقة الحوار الفاشل

انتى بس هتقلعيه دقايق
ياعم ولا ثانية

يا بنتى انا شيخ اكشفى وشك انتى مضطرة

عم شيخ على نفسك

بصوا بقة خلاصة الحوار علشان ننجز

يا تجيبوا سيكورتى بنت ..حارسة امن يعنى..او موظفة او ادارية

حد تشوف وشها يا خلاص..كله على بيته..

يا الله ياعم يالله يا سيدى من هنا

لا مافيش سيكوريتى بنت؟؟المطار فيه ..مينا ضبا فيه..

ليه هو احنا فين مش فى مصر ولا ايه؟؟مش بلد مسلمين ولا ايه؟؟

قال ايه..مافيش موظفات فى الميناء

..
بدا بقة الرخامة والكلام الكتيروالاسلوب الغير لبق اللى ممكن تتخيلوه من ناس بقة فى الموقف ده

واللى خلانى فعلا زعلت بعنى اخر كنت هعيط بس ليه بقة اعيط انا اتنرفزت وشخطت..

ده مش اسلوب

الدكتور بقة قالى..طب بس خلاص كده بقة اطلعى فوق..على الاتوبيس يالله

طلعت شوية مافيش شوية ونزلت

قلت زى زيها ..وانا مش هسيبها..ولا ثانية

نزلت معاها مرينا من بوابة علشان هتقابل مدير امن المدخل

الوحيد اللى كان لابس لبس ظابط وكان معاه الدكتور ..

مررورا شنطنا على جهاز قال يعنى المهم دخلت و صاحبتى الله يكرمها قالت للدكتور انا مش زعلانة
وهقد بره استناكم لكن مش هكشف وجهى خالص

ولا ثانية ولا لاى حد ..

خلاص اتفقنا اتفضلى فى اوضة العلاقات العامة كانوا طلعونا الاتوبيس وقالولنا خلاص اهدوءا ..

بيضحكوا علينا يعنى. المهم طلعت طبعا جرى وراها ولحقتها وقعدنا فعلا فى اوضة العلاقاتوانا نازلة لقيت واحد بقولىيابنتى هيا هتقعد مع الموظفات ما تخافيش..

اه يااا..............انت لسة مش قايل دلوقتى ماعندناش موظفات فى المينا

و قلبته وطلعت جرى وراها

المهم دخلنا قاعدنا.
طب كل الناس كانت رجالة..

وكل اللى فى الاوضى موظفين قاعدنا قاعدى

وكنا بنضحك على الموقف من أوله لأآخره..

لقينا واحد بيقولنا اضحكوا عادى وخدوا رحتكم

وقاعد بقة يكلمنا ازاى انه مستغرب انه فى شباب لسة بيتمسك بمبداه ويثبت عليه

وازاى انه مستغرب انى فضلت معاها

لغاية انه افتكرنا متربيين مع بعض

قاعدنا الساعتين او التلات ساعات دول ..

وبصراحة موظفين العلاقات العامة مقصروش خالص

جابولنا حاجة ساقعةكانت كوكاكولا..وكوكاكولا مقاطعة..بس احنا مش فى النادى يعنى..

واحنا بقة كنا حسيين ان احنا بقيين اصحاب بيت من كتر ذوق موظفين المينا

احسن حاجة كان في واحد نفسه يروح جنازة ابو واحد صحبه..ومش عارف ياخد الاذن من المدير وقعد متنرفز

وكان فاكر انه احنا اكيد كمان متغاظين من اللى حصلنا..بس احنا قولناله بقة احنا مش زعلانين

وبنحب مصر..وعادى

كل شوية كان لما يشوف حاجة منرفزاه

يقوم قايل ..مش بتحبوها يالله حبوها بقة

ايوة بجد بنحبك يا مصر.

.بنحبك حتى لو كان دمك تقيل احيانا

بنحبك خالص
قد ايه الموظفين دول كويسين مع بعض ماشاء الله

والمكان بصراحة كان فيه مراوح وستاير..

شايلة هم الفرجة على المينا فى الشمس...رخامة بقة

خلاص الباص وصل تانى الحمد لله

والموظف اصر يوصلنا لغاية لاباص وشرفتونا ونورتونا وكده

يعنى الشعب المصرى الحبوب بقة..وطيبة قلبه

طلعنا الباص طبعا كنا هبطنا من كتر القاعدة والاتوبيس كله كان مهدود من كتر اللف

حكينا لصحبنا على اللى حصل وقعدنا نضحك على حاجات كتير والاتوبيس كله اسكت هس

هم مالهم

اصل احنا تعبنا اوى..بنلف من ساعتهاواحنا برده تعبنا..تخيلوا قاعدين من ساعتها فى نفس الاوضة

احنا احتسبنا ده عند ربنا

..وصلنا بقة اجمل حاجة فى الرحلة

راس البر

مش هقولكم نضفت قد ايه عن آخر مرة كنت فيها

من عشر سنين كده..من ايام ما كنت بعمل شعرى ضفاير

وصلنا نادى المهندسين كان رائع

اكل نظيف..مكان نظيف ..خدمة نظيفة..الدكتور غدانا من على حساب الكلية..

دعم الرحلة

قد ايه كنا مبسوطين
اخيراااااااااااا شوفنا حاجة من الدعم للاتحاد
اخيراااااااااااااااا جيبنا حقنا من ديون الجامعة علينا
ركبنا الباص وطلعنا على اللسان
انا فاكرة انه كان فى خط ابيض بتاع البرزخ
بس انا بقة لما رحت مش لقيته

الدكتر قاعد يشرح مزايا حماية الشواطئ وانواعهاواحنا بندور على الخط الابيض
وديتوه فين؟؟

وشوفنا ازاى المركب لما بيقعدى من الماية العذبة للماية المالحة بيحصله فعلا اهتزاز جامد علشان نسبة الملوحة والكثافة وكمان تكسر الموجة

كان حاجة ممتعة ان احنا نربط بين دراستنا والحاجات اللى شوفناها

طبعا اتصورنا فى اللسان

هرينا الكمرة تصوير وكانت احلى ساعتين ما شفتش زيهم من زمان

وتطبيق للديموقراطية العادلة الدكتور سالنا تحبوا تكونوا ترجعوا على الساعة كام

صحبتى يا عينى طيبة قالتله 10 او 11 بس مش نزود

كل الناس ضحكت لانه احنا اصلا قايلين قبل كده اخرنا 8 المهم

اتفقنا التجمع بعد الجولة الحرة الساعة 6.45 وكلنا خلاص اتفقنا

كام ياشباب
6.45

عارفين طبعا على ما تجمعنا كانت الساعة كام؟؟ هسيبكم بقة تخمنوا
ركبنا الباص وكانت رحلة العودة..هكيلكم عليها بعدين..
بعد لما تقوليلى الباص اتحرك الساعة كام من راس البر؟؟

يالا العار

الصورة تبين اعتقال الامن لاحد الموطنين منا لشارع عينى عينك..
على أساس أنه الاحتلال ..لا حول ولا قوة إلا بالله

فى تصرف أهوج .. تعدت قوات أمن الطوارئ كل الحدود وقامت بعمل استفزازى الليلة تسبب فى حالة غليان واحتقان ينبئ عن انفجار وشيك بين الإخوان وكذلك المواطنين بمدينة طنطا
فقد قامت قوات أمن الطوارئ برعونة باعتقال ثلاثة من الأخوات بطنطا من الشارع حيث كن يوزعن أوراق دعاية لمرشح الإخوان بالشورى عن دائرة طنطا الأستاذ الدسوقى كليب
وكأنهم لم يكفهم حالة الاحتقان والغليان التى يعانى منها الإخوان من جراء التضييق والتجاوز والتعدى الرهيب على مرشحى الإخوان بالشورى .. وكان آخرها بالأمس متمثلاً فى حالة التعدى التى وقعت على الدكتور ياسر حمود عضو مجلس الشعب بالمنوفية
لتمتد التجاوزات إلى آخر حد لها الليلة فى اعتقال واحتجاز الأخوات .وأسماء الأخوات المعتقلات هى

-: هويدا أبو الفضل (ليسانس آداب)، داليا قطب (خريجة كلية الطب)، فاطمة قطب (خريجة كلية الطب البيطري)؛

وينتظر أن يتم عرضهن الليلة على النيابة أو احتجازهن بأحد أقسام مدينة طنطا لعرضهن على النيابة باكر .. وهو ما يسبب حالة غليان شديدة ...وهذه الفعلة الشنيعة لجهاز أمن حكومة الطوارئ لا يقترب من أخلاق أبى جهل فى الجاهلية حيث رفض أن يقتحم هو ومن معه بيت محمد صلى الله عليه وسلم ليلة الهجرة النبوية وقال لأصحاب اقتراح اقتحام المنزل النبوى :
" أتريدون أن تعيرنا العرب بأنا فزعنا بنات محمد " ...فأين هذا من ذاك ..!!!

..الخبر من مدونة إنسى..

بجد يالا العار..عار على أمن مصر..عار على حكومة غلبتها نخوة ابو جهل..غلبتها رجولة أبو جهل..ماكفهمش فزع أطفال المعتقلين فى الفجر....ماكفهمش إهانة زوجات وبنات المعتقلين فى كل زيارة..ومع كل عرض..فاعتقلوا بنات ومن أين؟؟من الشارع..

لا حول ولا قوة إلا بالله..حسبى الله ونعم الوكيل

هما بيخوفوا مين؟؟بيخوفوا كل اللى المرشحين..

طب وايه يعنى ماهم ضربوا النائب فى المنوفية ايه اللى حصل..خاف..اتراجع..لا طبعا

وماحدش باذن الله هيتراجع

حتى لو خدوا الأطفال من البيوت مش من الشوارع..

يا جماعة ماحدش متراجع..هما ليه مش مصدقين..

طب جايز بيخوفوا الباقيين؟؟طب وهما الباقيين يعنى مش فاهمين اللى بيحصل..

أنتم ممكن تفهمونى اى حاجة فى الدنيا واستوعبها باذن الله..لكن ليه الحكومة بتعمل كده؟؟ده اللى أنا مش قادرة أفهمه

اللى اعرفه واللى التاريخ اثبته انك علشان توئد فكرة محتاج فكرة أقوى واحسن تحرق الفكرة الأولى..

لكن علشان توئدها بطريقة اصحاب الأخدود اللى الحكومة عايشة فيها دى طبعا مش هيوصلوا لحاجة..

لموا كل الناس الارهابية دى واحرقوهم..او فى زمنا حطوهم فى المعتقلات..فده مش هيجيب نتيجة

لأن دايما هيطلعلهم رضيع يقول لأمه..يا اماه اثبيتى فإنك على الحق...

يا كل معتقل _.ومن النهاردة هنبدأ نضيف كلمة_ يا كل معتقلة

اثبتوا فإنكم على الحق

اثبتوا فإنكم على الحق

..

رسالة حبيب لكل مصر

أيها المصرى الكريم

تحية من عند الله مباركة طيبة ، فالسلام عليكم ورحمة الله وبركاته ... وبعد؛
فأتوجه إليك بهذا النداء وأنا أعلم يقينا أنك سوف تستمع إليه بكل عقلك وقلبك وتتجاوب معه بكل وجدانك وعواطفك .. فمروءتك وشهامتك وأصالتك تأبى عليك أن ترى إنسانا شريفا يضار فى حريته، وماله بغير ذنب ولا جريمة ..
أعلم يقينا أنك ترفض الظلم وتأباه، وأنك تقف دائما مع المظلومين أيا كانت عقيدتهم وأيا كان دينهم ..
لكنى أسألك .. هل يليق بمصر .. تاريخا وحضارة .. شعبا وحكومة أن يحال مجموعة من المدنيين الشرفاء والأوفياء والذين لا علاقة لهم من قريب أو من بعيد بعنف أو إرهاب أو اتجار بمخدرات، أقول هل يليق أن يحال هؤلاء إلى محكمة عسكرية ؟ وهل بلغت الخصومة السياسية إلى الحد الذى يفرض حظر على أموال ومنقولات وشركات هؤلاء الأفراد ؟ ولمصلحة من ؟
أيها المصرى النبيل

أعلم أنك لست بحاجة لأن أعرفك بالإخوان .. لأنهم يعيشون فى ضميرك ووجدانك .. فقط أذكّرك .. من باب (وَذَكِّرْ فَإِنَّ الذِّكْرَى تَنْفَعُ الْمُؤْمِنِينَ) هؤلاء الإخوان هم منك ولك .. هم أهلك وناسك .. هم يعملون فقط من أجلك .. من أجل أن تعيش حرا كريما، ومن أجل أن تعيش فى وطن قوى عزيز .. هم يريدون الخير والأمن والأمان لك .. هم الذين جاهدوا فى فلسطين ضد عصابات بنى صهيون .. هم الذين جاهدوا على ضفاف القناة ضد الاحتلال الإنجليزى .. هم الذين وقفوا يدافعون عن حرية هذا الشعب وكرامته وكرامة وطنهم وقد تحملوا فى سبيل ذلك كل أنواع التضحيات .. أنا أعلم أنهم تاريخ تحفظه ذاكرتك ويستحضره وعيك فى كل الأحداث التى تمر بك ... فلا تتردد أن تقف إلى جوارهم فى قضيتهم ، التى هى فى الحقيقة قضيتك
أيها المصرى الحبيب ...أنا لا أريد أن أكلفك شيئا فوق طاقتك , أو أن تقوم بعمل لا تقدر عليه، أو بموقف ربما يكلفك الكثير خاصة أمام نظام قمعى لا يقيم وزنا لدستور أو قانون أو حكم قضائى .. نظام لا يضع اعتبارا لكرامة إنسان أو حقوق أفراد .. إن كنت تستطيع أن تتكلم فتكلم .. تكلم مع أهلك .. مع جارك .. مع زميلك فى العمل .. إن كنت تستطيع أن تعبر عن قلقك على هذا الوطن فلا تدخر وسعا فى أن تبوح بما يعتمل فى صدرك من آلام وأحزان، بل ورفض لما ترى أنه إساءة واعتداء على حق هذا الوطن وانتهاك لكل ما هو جميل ونبيل .. فهذا الوطن هو مسئوليتك .. هو أمانة فى عنقك .. هو حاضرك ومستقبلك .. هو أهلك ومالك وولدك .. هو أرضك وعرضك .. هو كرامتك وشرفك .. لذا أرجو ألا تفرط فيه أو أن تنأى بنفسك عنه مؤثرا – كما يزعمون – السلامة وهى فى الحقيقة الندامة .. كل الندامة ، فضلا عن ضياع الوطن .
أيها المصرى العزيز ..
لابد أن يشعر الظالم أنه محاصر فى كل وقت .. وأنه مرفوض من كل الناس .. كل الناس .. يجب أن يشعر أن الأرض تبغضه .. وأن النفوس تكرهه .. وأن عامل الزمن ليس فى صالحه .. وأن ما يتمتع به من قوة لن تحميه ولن تسعفه .. لابد وأن يشعر أن هناك نهاية لطغيانه .. وأن هناك حدا لممارساته وتجاوزاته فى حق الوطن والشعب .
وأخيرا .. تقبل وافر تحياتى وعظيم تقديرى وخالص أمنياتى لك ولكل من حولك بمستقبل زاهر تشرق فيه شمس الحرية .. وتنعم فيه بالأمن والطمأنينة والسلام ؛

د. محمد حبيب

النائب الأول للمرشد العام للإخوان المسلمين

القاهرة فى : 14 من جمادى الأولى 1428هـ 31 من مايـــــو 2007م

على أعتاب الذكريات

ليل يمتد بصمته

نجومه تلقى على التحية بإشفاق

لربما تعرف هى كم أعانى..

حين أقف على أعتاب أيامى..

كم أذرف من دموع

طقوسا لحفلة الوداع

أطفات مصباحى

اوقدت الشموع

ارتميت بين سواد مشاعر الفراق

نفس أكمام الزهر الداكنة

نفس الأرصفة القاتمة

حتى رائحة الماضى..هى هى

نفس الوقفة الصامتة

وككل مرة..أنحنى لأضع الزهور

على أعتاب ذكرياتى..

أهب واقفة

ذكرياتى..حنينى

عذرا

فالوداع فن

لا اتقنه..

لا أتقنه..

.............الكآبة دى بمناسبة تخرجى

أشار تقرير مؤتمر البحوث إلى أن 55% من المصريين يعيشون تحت خط الفقر، وأن 25 مليون مواطن يسكنون العشش والمقابر، وأن إجمالي الديون 614 مليار جنيه، وأن الأموال المهرَّبة من البلاد بلغت قيمتُها 300 مليار دولار، وأن قيمة

الدولار كانت تساوي 85 قرشًا في عام 1981م، وهو الآن يساوي 6 جنيهات

طبعا أيام جدى وجدك مش هتتعوض ..أيام البيضة بمليم وربع كيلو الجبنة مش عارفة بكام كده..

بس بجد أحنا كده بنواجه كارثة

الكارثة الأكبر ان احنا نكون مش حاسيين..المصيبة بقة نكون حاسيين ونقول:"طب يعنى إحنا هنعمل إيه" هنغير الزمن..

طب ليه لا؟؟ ليه بجد ما يكون عندنا نفس نغير زمانا..مش بقول نرجع خمسين تلاتين سنة..ولا بقول نتقدم عشر سنين

بس تعالوا نكون فى عصرنا..حتى لو البلد منهوب خيرها..ومش متساب فيها اى رمق

ليه نكون رمز للفقر وماركة مسجلة فى الديون وعلم من اعلام الجهل؟؟

ليه مع انى شايفة ان فينا حاجات كتيرة حلوة..

بحس ان فينا عزيمة تهد جبال..بحس ان لما نحب حاجة بنتفانى فيها

تعالوا نجرب نحب البلد دى..تعالوا نجرب نحب الارض اللى هيتربى عليها ولادنا

جايز لما نحبها حاجات تتغير

السلبية والسكوت على الظلم مش بس جبن لا دى خيانة

ايوة خيانة..لو بتحبها هتتحرك علشانها

مش هتسيب الظلم يملاها بعدين يهدها على اللى فيها

الفقر جه من سكاتنا على النصب والغش

تعالوا نتفق..مش ساكتين

مش ساكتين على ظلمنا..مش ساكتين فى حقنا..

جربنا السكوت كتير.. ما تيجوا نجرب نتحرك ونتكلم؟؟

وحكمت المحكمة...

حكموا بالتأجيل ل17 يوليو..لمصلحة مين التأجيل؟؟

ولمصلحة مين منع الصحفيين وممثلين هيئات حقوق الانسان

'طب لما انتم عارفين ان اللى بتعملوه ده غلط..ليه الظلم؟؟

حسبى الله ونعم الوكيل

حسبى الله ونعم الوكيل

صور لجلسة النهاردة..منع للصحفيين الأجانب و منظمات حقوق الإنسان ومنع المحاميين كمان..والأهالى لم يسمح إلا باتوبيس صغير كله نساء و تم السماح لعدد 25 مش أكتر من الرجال بالدخول..صحفى اجنبى إندهش من الوضع وقال.."كانى أشاهد فيلم كوميدى" الحمد لله إنه مادخلش المحكمة
كان هيقول انا بشوف اللمبى..

من تانى..جلسة محاكمة عسكرية

تبدأ المحكمة العسكرية اليوم الأحد بمقر المحكمة بالهايكستب- برئاسة اللواء عبد الفتاح عبد الله- ثاني جلسات المحاكمة العسكرية لـ40 من قيادات جماعة الإخوان المسلمين، على رأسهم المهندس خيرت الشاطر النائب الثاني للمرشد العام للإخوان المسلمين، بينهم 34 داخل مصر و6 خارجها...وتُعدُّ جلسة اليوم هى الجلسة الأولى التي سيحضُر فيها المحامون هيئةَ الدفاع البالغ عددهم أكثر من 100 محام، .
..
أبتهل إلى الله بدعاء أحفظه :

" بسم الله على نفسهم..بسم الله على مالهم..بسم الله على أهل بيتهم..

اللهم إرضهم بقضاءك واجعله أحب إليهم مما أحبوا..حتى لا يحبوا تعجيل ما أخرت ولا تأخير ما عجلت"..آمين

يارب رحمتك..

يا حنان يا منان

يا حنان يا منان

يا حنان يا منان

..............................................................
أستمع الآن إلى إذاعة المهزلة
http://www.almahzala.com/
..الناطقة ضد ظلم المحاكمات
يتردد فى إذن الآن نشيد احفظه..

جيل بعد جيل بقيين على عهدنا

أكبر مستحيل نخلف فى يوم وعدنا

ولو طال بنا ليل

بكرة تعود شمسنا

أكيد راجعة يا شمسنا...

..نبقى فى انتظار حكم المحكمة..و من قبلها ننتظر رحمتك يالله

عشت و شفت

سرقة حوض ذهبي وزنه 80 كيلوغراماً
تبذل الشرطة اليابانية قصارى جهدها لمعرفة كيف سرق حوض حمام مصنوع من الذهب ثمنه 120 مليون ين (988 ألف دولار) ويزن نحو 80 كيلوغراماً من فندق قرب طوكيو. واكتشف العاملون في الفندق سرقة الحوض من حمام مشترك للرجال في الطابق العاشر من الفندق ..

يعنى لو حطينا من عندنا قيمة 12ألف دولار يبقى ثمنه بالصلاة على النبى مليون دولار..بجد اللى سرقه كان عنده حق..وقريب نشوف فيلم بيحكى ازاى واحد فاشل ومرتزق بس ذكى ومبدع متسألونيش ازاى حط خطة جهنمية لسرقة الحوض..وازاى انه اثر عليه بأشعة فتفتته وحوله لذرات دقيقة وبعدين بعتها بجهاز- برده هو اللى اخترعه-وبعته على شقته فى احد حوارى كوريا

ماعلينا ..يارب ما يلاقوا اللى سرقه ..حد يحط حوض فى فندق عام بمليون دولار!!!.

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
الموظفون في فرنسا يضيعون 20 دقيقة من وقت الإنتاج في تحية الصباح
في ظل وصول معدلات البطالة إلى 8% ونمو الاقتصاد بالكاد 2%(ده فى فرنسا طبعا مش عندنا) ...وعد ساركوزى (اللى لو متعرفوش فده الرئيس بتاعهم)بالتصدي لهذه المشكلة بإجراء إصلاحات تهدف إلى إحياء قيم العمل الشاق ومكافأة الأشخاص الذين يستيقظون مبكرا..وقال مازحا إن من الأمور التي تضيع الوقت هي عادة تحية الجميع في الصباح بتقبيلهم على الوجنتين. وقال «تضيع 20 دقيقة تقريبا بسبب ذلك

..ساركوزى ماجاش شاف الموظفين عننا بيعملوا ايه؟؟الموضوع مش سلام وكلام..ده فى طبيخ وتزويغ

وفى رشاوى وفى شكاوى كيدية..شكله بجد ماشافش الملوخية بتتقطع..ولا سندويتشات الفطار وهيا بتتعمل فى المصالح الحكومية

لا وتنرفز كمان من معدل النموبتاعه..ما يعرفش سعادته ان فى دول ماعندهاش معدل نمو ..(طبعا مش بتكلم على مصر حبيبتنا ..بتكلم عن الواق واق) ده الهند يا جماعة معدل النمو بقة 9.4

الهند ..اللى لما نيجى نتريق نقول (انت فاكرنى راكن الفيل بره؟؟) و ياهندى ويا هنادوة على رأى دكتور عندا( وعلى فكرة هنادوة ده جمع مدشدش مش جمع تكسير)متهيألى احنا مديون للهند برد اعتبار

.. الهند سبقتنا ..قصدى يعنى بدأت.. وسبقتنا.. واحنا لسة بندور على الصفر

مش عارفة دى غلطة الموظفين اللى بيضيعوا وقت..

ولا غلطة الحكومة اللى مش بتدى مرتبات زى الناس..

ولا غلطة الهند انها شدت حيلها