فى حاجة غريبة جدا وخنقانى..
بس خلاص أنا جيبت اخرى..
المواصلات هنا فى المنصورة تجاوزت مرحلة الملل والصعوبة
ووصلت معايا مرحلة اليأس
بقيت مش ممكنة
فى كل المناطق ..مش بس عند الجامعة
كان الاول أقوله طلخا يبقى عايز يدوسنى
الدراسات ...بيطنشنى
توريل...لا والله
لكن من البحر لآداب يقول لا؟؟
ومن الجلاء لأحمد ماهر يزعق؟؟
ولو أبعد من كده..يسبك واقف كده ومش يدينى أى ردة فعل
أنا مش عارفة التاكسى لو مش رايح اى حتة..بيبقى رايح فين؟؟
هتقولوا السرافيس..
هقولكم إنها مستبعدة من الاختيارات من أيام رمضان
وحتى بيبقى ماشى فاضى ومش راضى يركب الناس...سرافيس آخر الزمن
المحافظة لازم تشوف حل
..
كده بجد
صعب جدا...
الواحد بيخرج بدرى عن مواعيد خروجه قبل كده
بنص ساعة علشان يلحق يروح أى حتة
ده غير ان المشوار اللى كان بياخد ربع ساعة بقة نص
..
حتى لو كانت قريبة
وعلى أية حال...الحمد لله
احنا بنعرف نمشى
..بس بجد
حسبى الله ونعم الوكيل..
-----------------------------------------
معلشى يا جماعة
بس اذا مش فضفضت فى مدونتى هفضفض فين؟؟...
7 comments:
هييييه اول رد
فضفضي براحتك يا حبيبتي
عامة يعني موضوع المواصلات دا بقى صعب في كل حتة مش في المنصورة بس
عندنا في اسيوط مافيش زحمة اوي يعني والمواصلات نوعا ما كويسة بس التاكسي هوا اللي بيتحكم فيكِ وبمزاجه .. وحاجات كدا تخنق
انا الحمد لله اتعلمت السواقة ومعايا العربية وماشية بكرامتي :D
بس احيانا بضطر آخد تاكسيات .. والله المستعان
يياااااااااه بقالى كتير مارديتش عندك
النت كان عنده ظروف ..معلش بقى
وبعدين مواصلات المنصوره دى أصلا ....كلمه غير قابله للنشر...
انت زعلانه ليه؟؟
أنا كنت عندكم فى الترعه من يومين أنا وواحده صاحبتى وكنا صايمين كمان وواقفين ساعه الا ربع نستجدى التاكسيات وكأنك قلتيله عفريت ..يلا معلش
من حق عايزه أقوللك حاجه ..
وحشتينى ..
المواصلا بقت كارثة وسلاح مدمر للوقت والمال والاعصاب
تحياتى حبيبتى
شيماء
بصراحه معاكى بس للأمانه انا مره ف رمضان كنت ف القاهره وتانى كنت فى المنصورة قلت الى يشوف الزحمه القاهره يهون عليه الزحمه فى المنصورة
سلام عليكم
ربنا يجعل كلامنا خفيف في أول زيارة
إتكلمي وقولي كل إللي إنتي عايزة تقوليه بس يارب حد يسمع
ثم دي ظاهرة صحية حتى نتمكن من التفكير والابداع
أعتقد إنه فيه إبداع
المهم إذا إنك تخرجي كل اللي جواكي
ومش مهم أي حاجة تانية
ثم وعلى رأيك إذا مكنتيش هتفضفضي على مدونتك هتفضفضي فين
البيت بيتك يعني زي ما بيقولوا
معلش طولت في الكلام
سلام عليكم
نور..
طبعا فكرت اتعلم سواقة
بس للاسف واجهت ميت عقبة..
وعقبة..
فبصراحة كبرت دماغى..
واذا بتوع التاكسى مش زهقونا على الصبح
مين هيزهقنا..
؟؟
----------------
يقين ..ليكى وحشة( بفتح الواو)..بينا كلام
ساعة الا ربع..ده انا بقيت علشان اركبه من بيتنا للجامعة بقف نص ساعة ..
عايزة بقة تركبيه من الترعة لبيتكم فى ساعة الا ربع..
احمدى ربنا..انه مش داس عليكى ولا حدف فيكى حاجة
وعلى فكرة..انتى وحشانى اكتر
-------
شقاوة شعب..منورة المدونة شيماء..
وكان نفسى تجيلنا فى ظروف احسن من كده
بس بجد زى ماقلتى
مدمرات..مش مواصلات
----------------------
مواطن من العريش
طب القاهرة فيه ناس كتير اصلا
لكن المنصورة..والله اقل بكتير
ورغم كده
برده زحمة...
المشكلة ان فعلا التاكسى مش بيقف
مش بيقف
ده حتى مش عنده استعداد يسمع انت رايح فين
لازم بجد يكون فى حل..
--------------
الاخ bedo
زيارة واحدة لا تكفى..
وفعلا عندك حق..البيت بيتى
وبيتكم كمان على فكرة
------------
دمتم بكل خير
Post a Comment