زمان وانا صغيرة
كنت فى اليوم ده فرحانة جدا
لانى كنت بكون كبرت سنة
أيون..النهاردة يوم ميلادى
كنت بكون فرحانة ..
وكنت باخد اليوم كله لعب ..ده طبعا لومافيش مدرسة
خاصة انى كنت فى الهدى والنور- يعنى احتمالات الاجازة اكتر- لانى باخد يومين اجازة..
و لانى كنت بحب اتفرج على الكارتون
كنت اجرى جرى على التليفزيون الاقى مافيش كارتون
!!!
فى خطاب للريس
عيد الشرطة
...
-يوووووووه يا ناس كان لازم اجى للدنيا فى يوم فيه خطبة طويلة
يخلص الخطاب ..من هنا وفقرة الأطفال تكون خلصت
-يووووه ملل
كل سنة..كل سنة..لغاية لما سافرنا السعودية..
مافيش خطاب ..مافيش ملل..مافيش يوم ميلاد أصلا
كبرنا وكبرنا ..فتحت التليفزيون النهاردة
ادور على خطاب الريس..مافيش
ليه يا ناس...أصله خطب امبارح
بجد..يا خسارة
يعنى هشوف الكارتون.يعنى هقعد على فقرة الأطفال براحتى
يعنى ماليش حجة ولازم أكون مبسوطة طول اليوم
كوكب الأرض كله لازم يكون مبسوط..انى عايشة عليه من 22 سنة
كان ممكن مش يكون فى طموح؟؟
كان ممكن اصحابى مش يكون عندهم رقمى على موبايلاتهم؟؟
كان ممكن صحبتى اللى بتحبنى وكل ما تضايق ترفع سماعة التليفون تكلمنى ..مش يكون عندها طموح؟؟
كان ممكن بيتنا مش يكون فيه انا (طموح)؟؟
السنة دى مميزة جدا ..لانى نجوت من حادثتين
واحدة.. كان هيشيلنى فيها بلدوزر بس واحد فى الشارع شدنى من قدامه
ومرة بلعت دبوس ابرة وكنت بكلم ماما ..بس خرج الحمد لله..من غير ما ماما تاخد بالها انى كنت بجد بموت
ساعتها انا ما فكرتش الدنيا هيبقى شكلها ايه من غيرى..ساعتها فكرت
انا هعمل ايه لما اموت؟؟
بجد ساعتها حياتى كلها انحصرت فى كام مشهد كده وخلاص..
كنت بسمع الكلام ده لكن عمرى ما صدقته
لو حد جرب انه يموت بدبوس ..هيفهم قصدى ايه كويس
!!
لما بنكبر بجد بنزعل ..مش علشان خلاص مش هنشوف فقرة الاطفال
لا بنزعل..على كل سنة بضيع مننا من غير ما نكون عملنا فيها اللى علينا
قصرنا فى حق ربنا او حق نفسنا
او حق اللى حوالينا
..
كل المواقف اللى قصرت فيها هيا دى اللى شفتها
كان نفسى افتكر اى حاجة ..اى حاجة كويسة
بس مش افتكرت ..او مش لاقيت..مش عارفة
ده نفس اللى حسيت بيه النهاردة
خلصت خلاص..
و
يارب أحسن ختامنا
7 comments:
كمان اختى نبكى على كل عام و أخواننا فى كل مكان يُستهان بهم و يقتلون و يذبحون و يقتلون و يشردون وما لهم من ناصر ولا معين غير الله سبحانه وتعالى كفى به نصيرا وكيلا
جزاكم الله كل خيرالسلام عليكم
اولا الحمد لله الذى نجاكى من الحادثين
وكل عام وانت بخير بمناسبة يوم ميلادك
وفعلا كل ما بنكبر بنندم على العمر الذى ضاع منا وولى دون ان نستغله جيدا
وتذكرى ان اهل الجنة - جعلنا الله واياكم من اهلها -لا يندمون على شئ الا ساعة لا يطيعوا الله فيها
الله يعزك يا حماس
الاول
كل سنة وانتِ بألف خير ياطموح :)
وكل سنة دايما في طاعة وسعادة ..
ثانيا حمدا لله على السلامة من الحادثتين وخدي بالك من الدبابيس دي بجد :)
ربنا يحفظك ويسعدك..
دمتِ بكل ود
حمدا لله على سلامتك من الحادثتين يا غالية
وربنا يارب يحفظك ، ولعل الله اراد ان شاء الله لكِ الخير أن مد في عمرك .. استغليه في نفع الاسلام والمسلمين دوما وابدا .. فهذا هو جوهر الحياة
دمتِ بكل الود حبيبتي
اولا أنا فرحانه جدااا أكيد اعرفك ياطموح لانى كنت معاكى فى المدرسه
الحمد لله
ثانيا
من كام سنة برضه كنت بكون فرحانه جداااا بعيد الميلاد دا اليوم اللى إولدت فيه والدنيا طبعا نورت
لكن دلوقتى
حسيت إن فى عداد شغال
بيقول
مضى عام كامل ولم يتبق سوى ........ حاجة تفزع
ربنا يحسن خاتمتنا
ولا يسعنى إلا ان أقول لك
كل عام وأنتى إلى الله أقرب
وعلى طاعته أدوم
ولعمل الخيرات أسبق
------
mo'men mohamed
بالفعل أخى هذا والله أشد ما يبكينا
وجزاكم الله كل خير
--------------------
الله يعزك يا حماس
أخى الله يسلمك وحمد لله على سلامة حضرتك من مشوار القافلة
الله يكرمك يارب على تذكرتك وجعلنا الله من أهل الجنة
---------------------
همسة ..الله يكرمك يارب
سعيدة بزيارتك للمدونة جدا جدا جدا
والله يسلمك
نور
الله يسلمك يارب
بجد الحادثتي دول فوقوا الواحد كتير
دعواتك
---------------------
أنا مسلمة..
شفتى يعنى المدرسة كانت منورة علشانك
:)
تقبل الله دعاءك
نفس العداد شغال دلوقتى
يارب رحمتك
Post a Comment