ليه كده؟؟

امبارح كان يوم غريب خالص

كنت راحة الريف الاوروبى بتاعنا..قصدى يعنى قريتنا الصغيرة ومسقط راس العيلة

كلها ماعدا انا

طبعا كان بقالى زماااااااااان مش رحتها...

بس المهم ان السيارة تبعنا فى فترة نقاهة واستعادة رشاقة ...

بيتعملها عمرة ( بفتح العين والراء) عقبال سيارتكم يارب

وبالتالى هروح مواصلات ...

اخويا توشح وشاح الرجولة وقالى هجى معاكى

قلتله مافيش داعى لو مشغول...قالى لا انا اصلا كنت عايز

عملت نفسى مش خدت بالى من الجملة الاخيرة دى

الطريق ممكن ياخد من 20 دقيقة 40 وده راجع لجنون السواق

اول ماركبنا الميكروباص واحنا لسة على ارض المنصورة

هببببب

دبت خناقة

طبعا الطرف الاول كان سائق الميكروباص

والطرف التانى كان الظريف اللى ورايا..

والى الان لم افهم هو اتخانق ليه

بس اللى فهمته ان الموضوع كبير..وسمعت بقة الفاظ غريبة ..السواق يقولها والراجل بيقولها للسواق..

بس هيا طبعا بتعدى على ودانى الاول ..

بمعنى اوضح كانت بتخرم طبلة اذنى الاول وتعدى من الثقب ده للسواق ومن ثم توزع بالتساوى على باقى الركاب

المهم انه فجاءة لقيت الراجل ايديه بتتمدد ...تتمدد...لغاية لما وصلت للنظارة لقدام عنيا خلاص

شفت كفة ايديه من هنا ..وكنت هصوت من هنا

بس اخويا قعد يعمل فيها عاقل افندى ..وخلاص بقة يا استاذ ..اطلع بقة يا سيدى

يا عم الحاج حقك علينا...وحاجات من اللى بتتقال فى المناسبات دى

برده لسة بيتخانقوا.

.

اخر ما زهقوا من بعض...قالوا الكلمة اللى بتتقال فى المناسبات دى برده

لو راجل انزلى.

.

انا فطست على نفسى من الضحك الصراحة...

يعنى افرض سعتك انه منزلش خلاص يعنى بقة عيل ولا ايه مش فاهمة؟؟

اسلوب حوارى مقيت...

بدا بالصراخ وانتهى بان السواق لقيته فتح الزجاج اللى بيشقر علية انا والظريف اللى ورايا

ومادد ايديه بيشد فى الظريف اللى ورايا

طبعا اخويا قاله ايه ياعم ...ماخلاص بقة

ما تهدوا كده ياجماعة

الناس اتلمت وبقيت فرجة..

واللى ورايا برده مش راضى يسكت..

كنت عايزة التفتله اقوله خنقتنا والله

ما تسكت بقة شوية ..وددننننننننننننننننننى وجعتنى من صداعك

بس خلاص خلصوا شخيط ..وسكتوا وطلع السواق

وكل السيارة تنفست الصعداء..وخاصة ودااااااااانى المسكينة

سبحان الله

هو ليه احنا بنعمل كده فى بعض؟؟

ليه بنتعمد نبهدل بعض

ليه ده يبقى الطبيعى بتاعنا

نذل بعض

ونجرح بعض

ليه مش بنقدر ظروف بعض

ليه مش بنتناقش فى هدوء..

ليه لما يكون فيه مشكلة او اقتراح لازم نفرضه بالصوت والضرب والشتيمة

هو احترام الناس لبعضها راح فين؟؟؟

ده احنا بنى ادمين مع بعض!!

كنا بتناقش فى منتدى عيون الطلبة عن التعذيب فى مصر

احنا قبل ما نكون عرضة للتعذيب فى اقسام الشرطة او فى الشارع حتى فى البيت

احنا بنعذب بعض..

فعلا والله احنا اللى بنجيب الاهانة لنفسنا..

ونخلى نفوسنا هينة على اى حد

خلو كرامتنا من كرامة بعض ...

علشان لا انا ولا انت ولا اى حد يتهان فى يوم من الايام